दोन्ही घरचा पाहुणा उपाशी, अशोक गहलोतांची गत अशी तर होणार नाही?

राजस्थानमध्ये घडलेल्या घटनाक्रमासाठी आपण जबाबदार असून याबद्दल क्षमस्व आहोत, अशी भूमिका अशोक गहलोत यांनी घेतली. पण सचिन पायलट यांच्या सोनिया गांधींशी झालेल्या चर्चेतून गहलोत यांच्यासाठी धोक्याचे संकेत मिळत आहेत का, अशी शंका व्यक्त केली जातेय.
नवी दिल्लीः काँग्रेसचे राष्ट्रीय अध्यक्ष पद मिळण्याची संधी चालून आली असताना राजस्थानचं मुख्यमंत्री (Rajasthan CM) पदही आपल्या वर्चस्वाखाली ठेवण्याचा हट्ट अशोक गहलोत यांना भोवण्याची दाट शक्यता वर्तवली जातेय. राजस्थानमध्ये घडलेल्या राजकीय नाट्यानंतर अशोक गहलोत (Ashok Gehlot) यांनी अध्यक्ष पदाची (Congress President) निवडणूक लढणार नाही, असं स्पष्ट केलंय. तर राज्यातील घटनांसाठी आपण जबाबदार असल्याचंही मान्य केलंय. गहलोत यांच्या माफीने त्यांची पक्षावरील निष्ठा अधिक गडद झाल्याचे म्हटले जातेय. मात्र राजस्थानचं मुख्यमंत्री पदही त्यांना मिळेल की नाही, यावर शंकेचं सावट आहे.